|
|
Bepoalens bie ovvers (6: 1- 7:38)
|
Leviticus 06
01De HEER zee tegen Mozes:
02"Geef Aäron en zien zeuns dizze aanwiezens: 'Dit binnen veurschriften veur t brandovver. t Brandovver mout haile naacht op t altoar branden blieven, t vuur op t altoar mag nooit oetgoan. Bie t aanbreken van mörgen
03mout priester aask van t brandovver dat in t vuur verteerd is, van t altoar ofpakken en der noast hènleggen. Hai mout hierbie n linnen gewoad aan hebben, mit doar n linnen boksem onder aan.
04Doarnoa mout e zok omtrekken en aander klaaier aandoun. Aask mout e vervolgens noar aaskebult boeten legerkaamp tou brengen.
05t Vuur op t altoar mout aanblieven, t mag nooit oetgoan. Elke mörgen mout priester holt op t vuur doun, der n nij brandovver op leggen en t vet van t vree-ovver der op in rook opgoan loaten.
06t Vuur op t altoar mout aaltied branden blieven, t mag nooit oetgoan.
07Dit binnen veurschriften veur t koornovver: Aäron zien zeuns mouten t de HEER aanbaiden aan veurkaant van t altoar.
08Priester pakt n haandvol van t ovver: n paart van waaitenbloum, wat eulie en ale wierook dij op t altoar ligt. Dat mout e, of was t ovver haildaal, op t altoar in rook opgoan loaten, as n lekker roekende goave doar de HEER nocht aan het.
09Wat ter overblift, is veur Aäron en zien zeuns. t Mout eten worden as brood doar gain gèst in zit, op n haaileg stee, bie ingang van soamenkomsttènt.
10 t Mag nait mit gèst bakt worden. Ik geef heur t as aandail in mien ovvergoaven; t is alderhaailegst, krekt as t zuvernsovver en t schuldovver.
11 Aal wat man is van Aäron zien noazoaten mag der van eten. t Is veur aaid bestemd veur heur, van voader op zeun, as heur aandail in de HEER zien ovvergoaven. Ales wat ter mit in aanroaken komt, wordt zulm ook haaileg: t is aal veur de HEER.'"
12 De HEER zee tegen Mozes:
13 "Dit is ovvergoave dij Aäron en zien opvolgers van dag òf aan dat ze tou priester zaalfd binnen, doagelks de HEER aanbaiden mouten: n koornovver van n tiende efa waaitenbloum, n haalfschaid smörgens en n haalfschaid soavends.
14 Noadat meel mit eulie aanmongen is, mouten der broden van bakt worden op bakploat. Dij broden mouten in stokken broken worden en aanboden as koornovver, as n lekker roekende goave doar de HEER nocht aan het.
15 Ale noazoaten van Aäron dij hom opvolgen, mouten dit ovver brengen. t Is veur aaid bestemd veur de HEER. t Mout haildaal in rook opgoan.
16 Elk koornovver dij n priester brengt, mout haildaal ovverd worden: men mag der nait van eten."
17 De HEER zee tegen Mozes:
18 "Zeg tegen Aäron en zien zeuns: 'Dit binnen veurschriften veur t zuvernsovver: Op stee doar daaiern veur t brandovver slacht worden, mouten daaiern veur t zuvernsovver ook slacht worden, veur de HEER. Dit ovver is alderhaailegst.
19 t Vlaais is veur priester dij t zuvernsovver opdragt. t Mout op n haaileg stee eten worden, bie ingang van soamenkomsttènt.
20 Ales doar t vlaais van t ovver mit in aanroaken komt, wordt zulm ook haaileg: t is aal veur de HEER. Sputtert ter wat bloud op ain zien klaaier, den mouten dij op n haaileg stee wosken worden.
21 Diggelgoud doar t vlaais in kookt is, mout stokkendsloagen worden, en as t in bronzen of kopern raif kookt is, mout dat schuurd worden en mit wotter schoonspould.
22 Van priesterfemilie maggen allenneg manlu van t zuvernsovver eten; t is alderhaailegst.
23 Mor zuvernsovvers doar t bloud van noar soamenkomsttènt brocht is, dat t bruukt wordt in t haailegdom zulm om veur de HEER verzoenen te doun, maggen in gain gevaal eten worden: ze mouten opbraand worden.
|
Leviticus 07
01Dit binnen veurschriften veur t schuldovver: Dit ovver is alderhaailegst.
02Daaiern veur t schuldovver mouten op zulfde stee slacht worden as daaiern veur t brandovver. t Bloud mout priester tegen aal kanten van t altoar aan sprenkeln.
03Ale vet mout ovverd worden: t vet van steert en ale vet aan ingewanden,
04baaide nieren mit nierongels bie lennens en lutjeste kwaab van lever, dij mit nieren en aal vothoald worden mout.
05Priester zel dit aalmoal op t altoar in rook opgoan loaten as n ovvergoave aan de HEER. Zo is t n schuldovver.
06Ale manlu van priesterfemilie maggen der van eten, op n haaileg stee; t is alderhaailegst.
07Net as bie t zuvernsovver geldt dat t vlaais van schuldovver veur priester is, dij mit dit ovver verzoenen dut.
08Priester dij veur ain n brandovver brengt, krigt hoed van t daaier veur brandovver.
09n Koornovver dat in ovent bakt of in paan of op bakploat toumoakt wordt, is veur priester dij t opdragt.
10 Elk aander koornovver, aal of nait mit eulie aanmongen, is veur aal Aäron zien zeuns en wordt onder heur verdaild.
11 Dit binnen veurschriften veur t vree-ovver dat de HEER aanboden wordt:
12 Dij t ovver as daankbetugen aanbudt, mout bie t ovverdaaier dikke broden zunder gèst ovvern, toumoakt mit eulie, pladde kouken zunder gèst mit eulie bestreken, en dikke broden van fien waaitenbloum, aanmongen mit eulie.
13 Bie dizze goaven, dij e tougelieks mit t ovverdaaier brengen mout, zel e ook broden mit gèst doun.
14 Van elk soort brood wordt ter ain apaart holden en aan de HEER geven. Dij binnen veur priester dij t ovverdaaier zien bloud tegen ziedkanten van t altoar aan sprenkeld het.
15 t Vlaais van dit daankovver mout eten worden op dag dat t aanboden wordt. Der mag niks overstoan blieven aan volgende dag tou.
16 n Daaier dat aanboden wordt oet vrije wil of omdat ter n belofte noakommen worden mout, zel eten worden op dag dat t aanboden wordt. Mor wat ter overblift, mag aanderdoags eten worden.
17 Wat ter den nog van t ovverdaaier zien vlaais over is, mout op daarde dag opbraand worden.
18 As ter dij dag toch nog van t ovvervlaais eten wordt, zel t ovver nait aanveerd worden en dij t ovver brocht het, het ter niks aan. t Zel wat schandoalegs wezen en dij der van et, zel gevolgen van zien schuld ondergoan.
19 t Ovvervlaais dat mit wat onzuvers in aanroaken west het, mag ook nait eten worden: t mout opbraand worden. Elkenain dij raain is, mag van t ovvervlaais eten,
20 mor dij onraain is en et van de HEER zien vree-ovver, zel tou zien gemainschop oetstöt worden.
21 Dij wat onzuvers van n mensk of n daaier aanwèst het, of in aanroaken west het mit onzuver gedaaierte en den van vlaais van vree-ovver veur de HEER et, zel tou gemainschop oetstöt worden.'"
22 De HEER zee tegen Mozes:
23 "Zeg tegen Isrelieten: 'Vet van n koubaist, n schoap of n bok, mag ie nait eten.
24 t Vet van n daaier dat doodgoan is en t vet van n daaier dat doodbeten is, mag overaal veur bruukt worden, mor eten mag ie t in gain gevaal.
25 Dij vet et van n daaier dat as ovvergoave de HEER aanboden worden mag, zel tou gemainschop oetstöt worden.
26 Bloud mag ie net zo min eten, woar of ie ook wonen: gain bloud van vogels en gain bloud van laanddaaiern.
27 Dij bloud et, zel tou gemainschop oetstöt worden.'"
28 De HEER zee tegen Mozes:
29 "Zeg tegen Isrelieten: 'Dij de HEER n vree-ovver aanbaiden wil, mout n paart doarvan noar de HEER brengen.
30 Aigenhandeg mout e bie t vet, bòrst ook as ovvergoave de HEER aanbaiden. Bòrst mout veur de HEER omhoogstoken worden.
31 Priester mout t vet op t altoar in rook opgoan loaten, mor bòrst is veur Aäron en zien zeuns.
32 Rechterachtervörrel mout apaart holden worden en aan priester geven as zien aandail in joen vree-ovver.
33 Dij achtervörrel is veur dij van Aäron zien zeuns dij t bloud en t vet van vree-ovver opdragt.
34 Want van Isrelieten heur vree-ovvers neem ik bòrst en achtervörrel, dat ik ze veur aaid geef aan priester Aäron en zien zeuns, as n geschenk van Isrelieten.
35 Ze binnen veur Aäron en zien zeuns: t is heur aandail in ovvergoave veur de HEER, van dag òf dat ze kommen mozzen om veur de HEER as priester aansteld te worden.
36 De HEER het besteld, dat as geschenk van Isrelieten aan heur te geven, van dag òf dat hai heur zaalfd het. Dit veurschrift blift veur Isrelieten en heur noazoaten veur aaid van kracht.'"
37 Aan zo wied tou veurschriften veur t brandovver, t koornovver, t zuvernsovver, t schuldovver, t wijovver en t vree-ovver
38 dij de HEER op Sinai aan Mozes bekend moakt het, dou hai in Sinaiwoestijn Isrelieten bestelde de HEER heur goaven aan te baiden.
|
|
